Струга се соочува со сериозен еколошки инцидент откако две компании вршеле ископи во близина на изворите во селото Шум, што, според локалните власти, довело до загадување на водата за пиење во градот. По итната седница на Советот на Општина Струга, градоначалникот Менди Ќура побара итна санација на теренот и покренување кривична одговорност против одговорните лица.
„Никој нема право да ја загрозува водата што ја користат граѓаните на Струга. Побаравме од надлежните институции веднаш да излезат на терен, да се утврди степенот на загадувањето и да се преземат мерки за целосна санација“, изјави Ќура по завршувањето на седницата.
Тој потенцираше дека Општината нема да дозволи прикривање на случајот и дека ќе инсистира на целосна транспарентност. „Ќе бараме кривична одговорност за сите што со своето постапување придонеле за овој еколошки проблем. Здравјето на граѓаните е приоритет и нема компромис кога станува збор за заштита на водните ресурси“, додаде градоначалникот.
Од Советот информираа дека се побарани итни анализи на квалитетот на водата, како и вонреден инспекциски надзор. Доколку се потврди загадување, ќе следуваат соодветни законски санкции и обврска за компаниите да ја финансираат санацијата.
Граѓаните се повикани на внимателност додека траат проверките, а локалната самоуправа најави дека редовно ќе ја информира јавноста за сите понатамошни чекори и резултати од анализите.
