Денеска во Основниот суд во Струга започна главната расправа против градоначалникот Рамиз Мерко, обвинет за поттикнување етничка омраза преку поставување контроверзна спомен-плоча на влезот на општинската зграда. Според обвинението, плочата, поставена во март годинава, предизвикала поделби и нетрпеливост меѓу жителите, бидејќи нејзината содржина слави период од Втората светска војна кога западниот дел на Македонија бил под италијанска фашистичка окупација.
Според обвинението, спомен-плочата не била поставена со одлука на општинскиот Совет, што е спротивно на Законот за меморијални споменици и спомен-обележја. Поранешниот советник во Советот на Општина Струга, а сега заменик-министер за правда, Ален Деребан, изјави дека содржината на плочата предизвикала етнички раздор и ја оцени како сериозно нарушување на уставниот поредок на државата.
Комисијата за заштита од дискриминација потврди дека со поставувањето на плочата, градоначалникот Мерко предизвикал продолжено вознемирување кај жителите на Струга. Според нивните наоди, делувањето на Мерко се коси со принципите на етничка еднаквост и заеднички соживот, што е основен дел од Уставот на Македонија.
Градоначалникот пред судот изјави дека не се чувствува виновен, инсистирајќи дека поставувањето на плочата не претставува законски прекршок.
Покрај овој случај, денеска се одржаа и две одвоени рочишта за незаконско назначување директори во основни училишта, каде Мерко е обвинет за злоупотреба на службена положба и фалсификување документи.
Рамиз Мерко, кој е ставен на „црната листа“ на САД поради вмешаност во корупција, се соочува со сериозни правни предизвици. Против него се поднесени девет обвиненија за несовесно работење во службата, што дополнително го влошува неговиот правен статус.
lider.mk
