Охрид – легитимниот наследник на античкиот Лихнидос е и ќе биде моја најголема инспирација, вели Нина Ангелоска во интервју за Охрид1

Уметник со висок стил, перфекција, желба да се предочи реалноста пред очите на гледачот. Младата охриѓанка Нина Ангелоска се повеќе го „освојува“ Охрид и предочува пред широкиот спектар на јавниот аудиториум. Неодамна во рамките на Свети Климентовите празнувања таа ја имаше својата втора самостојна изложба, на која беа претставени дела од вечниот град, со постојана светлина во него и на нејзините дела кои таа ја додава.

Низ разговорот за Охрид1, Нина открива детали за својата голема љубов и наклонетост кон форографијата, инспирацијата која ја добива за слик на копчето од фотоапаратот како и следните планови и реализации кои ја очекуваат.

Охрид1: Од каде љубовта кон фотографијата, дали е наследно или можеби вродено тоа чувство и предизвик?

Нина: Најпрвин дозволете да се заблагодарам на вашиот портал за дадениот медиумски простор кој е значаен за млад уметник во контекст на навремено информирање на јавноста за настани од делот на културата кои можат и се поттик и за други уметници кои се двоумат или срамежливо ги пробиваат првите чекори во кариерниот пат. Љубовта кон фотографијата ДА ми е наследна. Мојот татко долги години се занимаваше со истата дејност и до ден денес ми е еден од најголемите критичари заедно со мојот ментор светски познатата фотографка Билјана Јуруковска од која на подорак го добив мојот фотоапарат кој ми е најубаво ланче кое со задоволство, гордо и чесно го носам во многу прилики од секојдневниот живот.

Охрид1: Колку нашиот Охрид претставува инспирација за твојата фотографија и кој дал на градот е најповеќе застапен низ фотографиите?

Нина: Охрид – легитимниот наследник на античкиот Лихнидос е и ќе биде моја најголема инспирација. Во Охрид буквално секоја педа земја е приказна која може да биде раскажана на многу начини, во различен формат, расположение и светлина. Цел тој дијапазон од можности се трудам да го изнесам на најпозитивен и афирмативен начин како би дала еден мал удел во тоа што Охрид навистина Е- СВЕТСКИ културно-историски и природен бисер неуништлив милениуми пред нас.

Охрид1:Мечта за досега нешто не фотографирано?

Охрид1: После средното училиште каде ќе продолжи Нина?

Нина: На крајот од оваа година добивам лична карта, нов пасош и гласачко ливче  сето тоа носи поголеми одговорности. Се повеќе е сигурно дека ќе студирам на Факултетот за физичко образование, спорт и здравје. Малкумина знаат дека сум каратистка со црн појас и пасиониран скијач, ја сакам планината и природата па се надевам дека коцките ќе се поклопат и образованието ќе биде само една формална дополна на моите интереси и преференции.

Охрид1: Колу самостојните изложби се поттик за уште поголеми достигнувања?

Нина: Изложбите се еден простор во кој делата кои ги создавам ги изнесувам пред очите на јавноста, разголени и спремни за критика, тоа само посебе не е наивно. Посетеноста на моите изложби ми дава поттик, но и обврска која ме задолжува понатака да бидам покреативна и посериозна во мојте намери и следни проекти.

Охрид1:Голем дел од фотографиите кои ги презентираат фотографи во денешно време се обработени со фотошоп. Дали користиш ти фото шоп ?

Нина: Сметам дека на фотографиите кои ги правам каде воглавно тема е Охрид со сиот раскош кој го поседува не му е потребна многу козметика. Поубава по мене е природната состојба без многу шминка, ботокс и пластика. Се осврнувам повеќе на природните феномени и светлината која во Охрид повторно и повторно ме изненадува. Секако дека техниката во контекст на помоќна опрема ме интересира, ја следам и се трудам да инвестирам (се самоинвестирам) во неа.