Со свечена Света Литургија во Соборниот храм во Мислешево денеска беше одбележан големиот христијански празник Рождество на Свети Јован Крстител – Иванден. Голем број верници присуствуваа на богослужбата, заеднички упатувајќи молитви за здравје, мир и Божји благослов.
Празничната атмосфера продолжи и во вечерните часови со богата културно-уметничка програма. Пред бројната публика настапија играорна група од Мислешево, како и гости од Србија и Босна и Херцеговина, кои со своите настапи придонесоа за вистинско празнично расположение и дружење.
Од црковната општина најавија дека ваквиот начин на одбележување на Иванден ќе прерасне во традиција, а веќе од следната година ќе започне новата културно-духовна манифестација „Мислешевски средби“. Според најавите, манифестацијата ќе започнува секоја година на 7 јули, на празникот Рождество на Свети Јован Крстител, а ќе завршува на 9 август, со големата прослава посветена на Свети Климент Охридски.
Организаторите упатија искрена благодарност до сите жители на Мислешево, како и до пријателите и добротворите на црквата, кои со својата поддршка и несебична помош придонесуваат за развојот на парохијата и за успешно организирање на духовните и културните настани.
Празничното чествување заврши со порака за единство, вера и заедништво, со молитва Свети Јован Крстител да биде постојан застапник пред Бога за сите верници и за целата заедница.
