Во духот на заедништвото и почитта кон богатите традиции, во организација на Локалниот совет на млади, а финансиски поддржан од Општина Охрид, вчера во Центарот за култура „Григор Прличев“ во Охрид се одржа мултикултурен фестивал посветен на славење на различностите и зачувување на културното наследство. Целиот концепт и организација на настанот беа осмислени и водени од граѓанскconиот активист Вахид Мемед, кој со својата визија успеа да создаде незаборавен настан што ги зближи сите заедници.
Фестивалот беше вистинска културна фиеста, каде што посетителите уживаа во претставување на традиционални носии од различни етнички заедници, меѓу кои македонски, албански, турски и египќански носии. Овие уникатни обележја на културното наследство ја одразија богатата историја и традиција на заедниците, создавајќи мост на разбирање и почит.
Настанот беше збогатен со извонредни настапи на културно-уметничките друштва КУД „Пирамида“ и КУД „Гердан од бисери“, кои ја воодушевија публиката со своите фолклорни изведби и традиционални македонски ора. Нивната енергија и изведба ја доловија убавината на македонскиот и египќанскиот фолклор, додека публиката го следеше секој чекор со ентузијазам.
Дополнително, на фестивалот беа претставени традиционални занаети, меѓу кои ракотворби, резби и ткаење, како и изложба на традиционална храна од различни културни заедници. Посетителите имаа можност да ги дегустираат автентичните вкусови што го одразуваат богатството на нашата мултикултурна средина.
Овој фестивал беше потсетник дека различностите не само што не обединуваат, туку и го збогатуваат нашето секојдневие. Благодарение на посветеноста на ЛСМ мултикултурниот фестивал уште еднаш покажа дека заедничката традиција и култура се основа за изградба на посветла иднина.
„Богатството на различностите“ во Охрид го инспирираше духот на заедништвото, повикувајќи сите да го зачуваат и негуваат своето културно наследство.
