Штрајкот во Луфтханза ескалира токму во неделата кога компанијата одбележува 100 години постоење. Иако штрајкот на пилотите требаше да заврши овој вторник, синдикатот УФО најави дека и кабинскиот персонал ќе штрајкува до четврток, што значи дека протест ќе има и во среда – на самиот ден на јубилејот.
Паралелно со последните часови од пилотскиот штрајк, синдикатот УФО ги повика стјуардите и стјуардесите на уште два дена прекин на работата во Луфтханза и Луфтханза Ситилајн. Станува збор за веќе петти бран штрајкови на авионскиот персонал.
Овој штрајк целосно ја засенува свеченоста планирана за среда, по повод 100-годишнината од основањето на Луфтханза. Раководството на концернот организира голем настан на кој се очекуваат и високи гости, меѓу кои и канцеларот Фридрих Мерц. Истовремено, синдикатите најавија протест пред седиштето на компанијата на аеродромот во Франкфурт – токму на денот на прославата.
Претседателот на синдикатот УФО, Јоахим Васкез Биргер, смета дека не постои подобро место за протест. „Доколку раководството заедно со политичарите слави 100 години Луфтханза, ние токму таму ќе покажеме под какви услови функционира овој работодавач и на чии грбови се носат актуелните одлуки“, изјави тој.
DW
