Популарниот охридски и македонски гитарист Владимир Василески Четкар е прогласен за најпопуларен џез артист на годинешното издание на манифестацијата Златна бубамара на популарноста, која вечерва се одржа во Скопје.
Четкар е композитор, аранжер, продуцент, гитарист и вокалист, роден во Охрид. Музичкиот вкус го гради под големо влијание од џез, фанк, соул и диско бендови и музичари како Change, Chic, Earth Wind and Fire, Patrice Rushen, Cameo, The Brothers Johnson, Wes Montgomery, George Benson, Quincy Jones, Jamiroquai и многу други. Подоцна заминува во САД каде се образува на престижниот музички колеџ Berklee.
Меѓународните критичари го сметаат за едно од највозбудливите имиња во својот жанр, свежа музичка сила која е единствена во денешната музичка индустрија поради фактот што тој самиот продуцира, компонира, оркестрира, аранжира и изведува своја оригинална музика, совршен музичар кој веќе импресионирал многу од своите лични влијанија, почнувајќи од легендарни продуценти како што се Davide Romani од Change, Bob Esti, Patrick Adams, Tom Multon, гитарската легенда George Benson, како и француските диско витези од Playboy Mansion, Dimitri From Paris и Bob Sinclair.
Неговата музика е претставена на меѓународно ниво од истакнати музички етикети како што се P-Vine Records во Јапонија, C&L Music во Јужна Кореја, Hitman Jazz Records за Тајланд и Југоисточна Азија, Expansion Records во Обединетото Кралство и други, додека постојано се емитува на национални и специјализирани радија на глобално ниво.
