Водоводот Струга се соочува со голем долг кон ЕВН вреден близу 300 илјади евра. Водоснабдувањето на градот го обезбедуваат подземни пумпи кои трошат многу електрична енергија. Бидејќи работат 24/7, компанијата подлежи на четвртиот тарифен блок од 4 милиони денари месечно. Директорот на компанијата Дашмир Насуфи вели дека овој долг постепено се наталожувал.
„Долгот се акумулираше и како резултат на пандемијата, кога значително поскапеа струјата и се акумулираше многу голем долг, а ЕВН ни се закануваше двапати месечно, три пати месечно, платете толку , плаќате онолку и навистина не можете да си ги дозволите сите тие трошоци и побаравме помош од Општината и АД Ком да ни излезат на помош и да ја извршиме наплатата само со првата стапка за да можеме сето тоа да го издржиме“, вели Дашмир Насуфи.
Насуфи се жали дека долгот кон ЕВН не им дозволува да функционираат нормално и да се снабдат со потребната опрема и технологија за претпријатието, бидејќи инфраструктурата на Водоводот е стара и постојано неисправна.
„Се обидуваме да соработуваме со градоначалникот и предвидовме во буџетот да преземеме чекори за да направиме некои промени и да принудиме некои бизниси да имаат сопствена вода од езерото и да ја минимизираме потрошувачката на енергија, бидејќи немаме друга алтернатива, немоќни сме ако владата не ни помогне. Владата навистина треба да ни помогне“, вели Дашмир Насуфи.
Компанијата има законска рамка која ги ограничува месечните трошоци на 8,5 милиони. Околу 6 и пол милиони се само платите на вработените, а уште 2 милиони остануваат за трошоци, дефекти и плаќања за струја, што е малку во споредба со тоа што месечните сметки за струја во ова претпријатие се 4 милиони. Поради тоа, мнозинството од Советот на општината гласаше за да се плати со дел од наплатениот долг од страна на Општината, одлука која не беше добро прифатена од советниците на ВМРО-ДПМНЕ.
