Поради силниот зимски бран со леден студ кој владее во повеќе сојузни држави во САД, досега загинале најмалку 29 лица. Како што соопштија властите и американските медиуми во понеделникот (по локално време), причините за смрт биле хипотермија, како и несреќи поврзани со сообраќај, санкање и чистење снег. Силните врнежи од снег предизвикаа и прекини на електричната енергија, особено на југот на земјата. Во најмалку 20 сојузни држави и во главниот град Вашингтон и понатаму важи вонредна состојба.
Во Њујорк властите пријавија осум жртви. Причините за смртта сè уште се утврдуваат. Првично не беше јасно дали сите случаи се поврзани со зимската бура.
Според интернет-страницата Poweroutage.com, во понеделникот вечерта и натаму повеќе од 550.000 домаќинства, главно на југот на САД, останале без струја. Во сојузната држава Тенеси речиси 200.000 домаќинства биле зафатени од прекини, а во Мисисипи повеќе од 147.000 домаќинства.
Националната метеоролошка служба предупреди на платформата X дека температурите во голем дел од северните региони на САД „можат да останат под нулата до 1 февруари“. Дополнително, „рекордно ниските температури оваа ноќ на југот“ претставуваат опасност поради продолжените прекини на струја.
На неколку големи аеродроми како во Вашингтон, Филаделфија и Њујорк, на викендот беа откажани речиси сите летови. Според интернет-страницата Flightaware.com, од саботата па наваму на национално ниво биле откажани повеќе од 19.000 летови.
Студениот бран во неделата се придвижи од југот кон североистокот на САД. Зафатени беа сојузните држави од Тексас до Северна Каролина, како и источните метрополи Вашингтон и Њујорк. Властите ги повикаа луѓето да останат дома. Во северните држави беше издадено предупредување за животно загрозувачки студ до минус 45 степени Целзиусови во наредните денови.
Студениот бран се движи над голем дел од САД од саботата. Министерската за домашна безбедност Кристи Ноем претходно предупреди на „историска зимска бура“. Метеоролозите очекуваат дека низ целата земја ќе бидат погодени најмалку 160 милиони луѓе.
Американскиот претседател Доналд Трамп ги повика граѓаните на претпазливост. „Останете безбедни и останете на топло“, изјави тој на својот онлајн-сервис Трут соушл. Трамп го искористи силниот зимски бран за повторно да ги изрази своите сомнежи за климатските промени предизвикани од човекот: „Може ли климатските бунтовници да ми објаснат: што се случи со глобалното затоплување?“, напиша тој.
Екстремната временска состојба во САД е предизвикана од деформација на поларниот вител, со што студен арктички воздух се спушта кон југ. Научниците сметаат дека зачестената појава би можела да биде поврзана со климатските промени.
DW
