Градоначалникот на Општина Струга, Менди Ќура, оствари средба со претставници на Џудо клубот „Дрим“ – Струга, на која се разговараше за досегашните успеси на клубот, како и за предизвиците со кои се соочуваат во нивното работење.
На средбата беше истакната важната улога на спортските клубови во развојот на младите, промоцијата на здрави животни навики и афирмацијата на Струга на национално и меѓународно ниво.
Градоначалникот Ќура потенцираше дека Општина Струга останува силен поддржувач на спортот.
Во тековната година, за поддршка на спортот се издвоени 4.000.000 денари, со најава дека овој износ ќе биде дополнително зголемен во наредната година.Новата Програма и Правилник за спорт, усвоени на последната седница на Советот на Општина Струга, воспоставуваат сеопфатна и систематска рамка за развој и унапредување на спортот на локално ниво. Со нив се обезбедува континуирана и транспарентна поддршка на спортските клубови, се поттикнува организацијата на спортски манифестации и фестивали како значаен дел од спортскиот и општествениот живот, а истовремено се создаваат можности за поддршка и афирмација на индивидуалните спортисти и нивните резултати.
Општина Струга продолжува да инвестира во спортот како двигател на здраво, активно и успешно општество.
