Сообраќајна несреќа се случи вечерва на булеварот „Свети Наум Охридски“, во близина на населбата Рача во Охрид.
Според информациите од местото на настанот, по силниот судир автомобилите биле оттурнати кон работ на коловозот, но еластичната заштитна ограда (банкината) ги спречила да излетаат на тротоарот. Токму оваа заштитна ограда, според очевидци, спречила да дојде до многу потешки последици, бидејќи на тротоарот секојдневно се движат голем број пешаци. За среќа, во овој случај не е повреден ниту еден пешак.
На местото на настанот интервенираше полицијата, која изврши увид, а сообраќајот во тој дел од булеварот се одвиваше отежнато.
Булеварот „Свети Наум Охридски“ е една од најшироките и најсовремено уредени сообраќајници во Охрид. Поради неговиот изглед, дел од возачите создаваат впечаток дека се движат по автопат, па често возат со брзина поголема од дозволената. Токму затоа, надлежните и сообраќајните експерти постојано апелираат до возачите да ги почитуваат ограничувањата на брзината и сообраќајните правила, бидејќи станува збор за булевар, а не за автопат.
Меѓу мерките што треба да придонесат за поголема безбедност на оваа делница е и системот „Безбеден град“. На булеварот „Свети Наум Охридски“ веќе се поставени безбедносни камери, но граѓаните со нетрпение очекуваат тие да бидат ставени во функција. Очекувањата се дека со нивното активирање ќе се зголеми контролата врз сообраќајот, ќе се санкционираат возачите кои ги прекршуваат правилата, особено оние што ја надминуваат дозволената брзина, и ќе се придонесе за намалување на бројот на сообраќајни незгоди на оваа фреквентна сообраќајница.
