Одрон од камења и земја утрово предизвика инцидент на регионалниот пат Струга–Дебар, при што е оштетено патничко возило кое се движело по оваа делница.
Според првичните информации, одронот се случил на критичен дел од патот, познат по честите свлечишта, особено по врнежи од дожд. Камењата паднале директно врз возилото, предизвикувајќи материјална штета.
За среќа, нема информации за потешко повредени лица. На местото на настанот интервенирале надлежните служби, кои работат на расчистување на патот и обезбедување на безбедно одвивање на сообраќајот. Сообраќајот во моментов се одвива отежнато и со повремени прекини.
Од надлежните апелираат до возачите да бидат особено внимателни, да ја прилагодат брзината на условите на патот и да ги почитуваат поставените сообраќајни знаци.
Се препорачува, доколку е можно, користење на алтернативни правци сè додека не се нормализира состојбата на терен. Повеќе информации се очекуваат во текот на денот.
