Од Здружението за спортско едрење „Акватика Јахтинг“ од Охрид иницираат донаторска акција за набавка на половно патничко комбе за потребите на клубот.
Како и повеќето спортски клубови водени од ентузијазмот и љубовта кон самиот спорт, и Едриличарскиот клуб „Акватика Јахтинг“ од Охрид се соочува со потреба од дополнителни финансиски средства за набавка на половно патничко комбе (8+1 верзија) за настап на регати во земјата и странство, ја објаснуваат основната идеја на акцијата од клубот.
– Од исклучителна важност во градење на успешни млади спортисти, мотивирани натпреварувачи и учење преку размена на искуства е постојаното натпреварување и учества на домашни и меѓународни регати. Комбето ќе се користи исклучиво за транспорт на деца-натпреварувачи од Школата за едрење кои едрат во класите Оптимист, ILCA 4, класата 470, на регати во земјата и странство, потенцираат од „Акватика Јахтинг“.
Додаваат дека биле извршени детални анализи на пазарот за цена на чинење на половни патнички комбиња во земјата и странство и биле консултирани неколку увозници на половни патнички комбиња, но и авто салони.
– Според нив е утврдена најниска сума од 450.000 денари потребна за набавка на половно патничко комбе (8+1 верзија на седишта), со вградена еуро кука за влечење и со ЕУР стандарди за издувни гасови. Трошоците за регистрација и зелен картон, како и понатамошно тековно одржување ќе ги сноси ЕК „Акватика Јахтинг“. Направени се и дополнителни анализи и пресметки според кои, доколку во наредните 5 години, вклучувајќи ја и тековната, се изнајмува комбе за настап на регати во земјата и странство, ќе бидат потребни околу 45.000 евра. Оваа огромна сума, која може да се заштеди со набавката на половно комбе, ќе може да се намени за купување на опрема и едрилици за младите едриличари да можат да бидат конкурентни на регатите со своите врсници од цела Европа, но и во светски рамки, информираат од „Акватика Јахтинг“.
Нивната донаторска акција можете да ја поддржите ОВДЕ.
