Одличен настап на младите пливачи на ПК „Струга“ на 22. издание на пливачкиот натпревар NEMO CUP 2026, што се одржа во Скопје. Струшкиот клуб настапи со 23 пливачи, кои освоија вкупно 12 медали – два златни, три сребрени и седум бронзени, потврдувајќи го својот потенцијал и посветеноста кон пливачкиот спорт.
Најуспешни во своите дисциплини беа Антонија Чакар и Георгина Ѓоршески, кои се закитија со златни медали во дисциплината 50 метри градно. Чакар освои и сребро на 100 метри градно, додека Ѓоршески со својот настап се искачи на највисокото место на победничкиот подиум, останати кои освоија медали се:
Значаен успех оствари и Ангела Филева, која освои сребрен медал на 50 метри грбно, како и бронзени одличја на 50 метри слободно, 50 метри делфин и во дисциплината градно.
Деспина Чакар се закити со бронзени медали на 100 и 200 метри градно, како и со бронзено одличје во апсолутната категорија. Меѓу освојувачите на медали е и Сара Филева, која освои бронза на 50 метри слободно и 50 метри грбно.
Покрај медалистите, и останатите членови на клубот забележаа добри настапи, при што многумина ги подобрија своите лични времиња. За младите спортисти, ваквите натпревари се важна можност за стекнување искуство, напредување и проверка на сопствените способности во конкуренција со други пливачи.
Од ПК „Струга“ упатија честитки до сите натпреварувачи за вложениот труд, борбеноста и спортскиот дух, а посебна благодарност изразија и до родителите за нивната постојана поддршка.
Со освоените 12 медали и подобрените лични резултати, младите пливачи од Струга уште еднаш покажаа дека посветеноста и упорната работа се важен дел од спортскиот развој.
