На депонијата „Буково“, од страна на чуварската служба на ЈП„Охридски Комуналец“, беа затекнати лица кои неовластено влегле во просторот на депонијата.
Чуварската служба веднаш и експресно реагирала и ги предупредила лицата да го напуштат просторот. И покрај даденото предупредување и наредбата од страна на чуварот, лицата одбиле да ја напуштат депонијата.
Поради нивното противење и неовластеното присуство, чуварската служба веднаш го пријавила случајот до СВР Охрид. Припадниците на СВР Охрид навремено и професионално постапиле по пријавата и ги отстраниле лицата од просторот на депонијата.
Според сознанијата од терен, лицата биле затекнати при активност поврзана со палење кабли. Ваквото постапување претставува сериозна опасност за предизвикување пожар на депонијата „Буково“, особено имајќи ја предвид природата и условите на депонијата.
Благодарение на брзата реакција на чуварската служба, како и навременото постапување на СВР Охрид, спречена е можноста за понатамошно дејствување и потенцијално предизвикување пожар.
ЈП „Охридски Комуналец“ упатува благодарност до чуварската служба за професионалното и навремено постапување, како и до СВР Охрид за брзата реакција.
Воедно, апелираме до сите граѓани да не влегуваат неовластено во просторот на депонијата и да не преземаат активности со кои може да се загрози безбедноста на депонијата, вработените и животната средина.
