Охриѓанецот Ненад Целески од Таеквондо клубот „Хваранг Фист“ стигна до првиот медал за него на „Скопје Опен 2025“ Г1, најголемиот настан за оваа година кога станува збор за индивидуални спортски настани во Република Македонија.
– 40 држави од целиот свет дојдоа во Скопје по бодови за олимписка норма на „Скопје Опен 2025“, Г1 турнир кој се наоѓа на официјалниот календар на светската таеквондо асоцијација. Ова е прв медал за Ненад Целески и нашиот клуб во елитните натпреварувања од рангот на Г1 и Е1 каде доаѓа светската елита по бодови за олимписка норма. Целески освои сребрен медал во категорија јуниори +78 кг и ги заработи своите први бодови од овие турнири. По убедливата победа над Францускиот натпреварувач Мохамед Кешише со 2:0, во финалната борба против Абазовиќ Хамза од БиХ загуби тесно со 2:1, информираат од „Хваранг Фист“.
Додаваат дека, покрај Ненад, учество на турнирот зеле и Петар Петкоски, кој после убедливата победа над бугарскиот претставник, во четвртфиналето беше запрен од српскиот натпреварувач во борбата за медал, како и Јана Спироска и Ѓорѓи Петкоски, кои беа елиминирани уште во првото коло.
– Во сениорска конкуренција настапи Миа Спироска во категоријата -53 кг, но за жал загуби од претставничката на Шпанија во првото коло. Голем успех постигна и нашиот најдобар натпреварувач и олимписки медалист Дејан Ѓорѓиески, освојувајќи го златниот медал во својата категорија и вредни бодови за олимписка норма за Олимписките игри во Лос Анѓелес во 2028 година, потенцираат од клубот од каде испраќаат голема благодарност до сите нивни поддржувачи.
ohridpress.com.mk
