Меркел утре во Белград, задутре во Тирана

epa08842909 German Chancellor Angela Merkel delivers a speech to the German Bundestag in Berlin, Germany, 26 November 2020. Merkel delivered a government declaration to the members of the German parliament Bundestag on how to cope with the Covid-19 pandemic situation. EPA-EFE/CLEMENS BILAN

Германската канцеларка Ангела Меркел утре ќе допатува во Белград каде ќе разговара со српскиот претседател Александар Вучиќ, а во вторник во Тирана ја завршува европската турнеја, каде ќе има средба со премиерот Еди Рама. На средбата во Тирана ќе присуствуваат и шефовите на владите на Северна Македонија, Косово и Босна и Херцеговина.

Африм Красниќи од Институтот за политички студии во Тирана за Бета изјави дека посетата на највлијателната германска политичарка е многу поважна за Западен Балкан во целина отколку за самата Албанија.

– Таа го обновува интересот и го враќа Западен Балкан како приоритет за Германија и ЕУ, особено по тенденцијата на ЕУ и САД, во последните години, да се повлечат од овој регион. Исто така, доаѓа како одговор на бранот критики и скептицизам во регионот кон стратегијата за проширување на ЕУ. Германија го поддржува отворањето на преговорите за ЕУ ​​со Албанија и Северна Македонија, а Меркел инвестираше во приближувањето на ставовите во рамки на ЕУ на тој план, рече Красниќи.

Политичкиот коментатор од Тирана, Бен Андони, за Бета изјави дека албанскиот премиер Еди Рама е еден од лидерите што се залагаше за одредени елементи на Берлинскиот процес.

– Тоа значи односи со Србија и Северна Македонија, регионален пазар, но и балканската железничка платформа … Но, Тирана е исто така добра можност да се најдат агли во триаголникот Србија-Косово-Албанија, а канцеларката Меркел игра внимателно, за иднината, рече Андони.

Красниќи, пак, посочува дека за Албанија, главната вредност на посетата на германската канцеларка е потврда за односите и напредокот што Албанија го направи, особено во судските реформи и обнова на политичкиот живот во институциите.

– Критичката реторика на премиерот Рама и неговите повластени врски со Турција беа забележани со загриженост во Германија, така што посетата ја враќа опцијата ЕУ како опција која нема алтернатива, оценува Красниќи.

Меркел ќе зборува и за „заедничкиот регионален пазар” во Тирана. Сите земји од Западен Балкан се обврзаа дека ќе го спроведат на последната виртуелна конференција, со која таа претседаваше на 5 јули.

Берлинскиот процес, како иницијатива силно поддржана од канцеларката Меркел, започна во 2014 година и има за цел зајакнување на соработката меѓу земјите од Западен Балкан во областа на економијата, транспортот и енергетиката.

 

извор/фото: агенции

Close