Пецаков: Ќе направиме индустриска зона во Охрид и ќе го зголемиме бројот на туристи, време е Охрид да ниже успеси

Охрид 4 години е заборавен. Нема нови проекти, нема ниту една капитална инвестиција. Загрозен беше статусот на градот како заштитено културно наследство под УНЕСКО, истакна на денешнава прес конфереција кандидатот за градоначалник Кирил Пецаков.

Пецаков додаде:

Урбаната мафија царуваше и во Охрид за 4 години се изградија преку 600 дивоградби, кои се составен дел од регистарот на дивоградби на општина Охрид, дел од нив репрезентативни и се уште видливи.

Градоначалникот се сојузи со урбаната мафија, а ги стави охриѓани и нивниот интерес во заден план.

Ова го посочува кандидатот за градоначалник на Охрид од редовите на ВМРО-ДПМНЕ Кирил Пецаков, кој зборува за програмата која ја планира за општината доколку победи на престојните локални избори.

Време е да и ставиме крај на мафијата, криминалот и корупцијата. Јас ќе бидам градоначалник на охриѓани и ќе го застапувам само нивниот интерес. Заштитата на културното наследство, грижа за животната средина и за езерото и градење само по закон. Време е за нов пристап и за грижа за заедничкото, за тоа што ни го оставила природата и нашите предци.

Нема да дозволам во 21 век по завршување на мојот мандат да се зборува за немање на водоводи и канализации. Ќе инвестираме во инфраструктурата и ќе се насочиме кон обезбедување на основните потреби за живот.

Ќе спроведам ревитализација на Студенчишкото блато, влез на Охрид во биосферен резерват и грижа за сливното подрачје на водите и реките во Охридското езеро, вели Пецаков.

Додава дека ако сакаме Охрид да се развива, младите да остануваат и да имаат иднина, потребно е отворање на нови работни места, кои што ќе ги генерира новата индустриска зона во Охрид, во која и локалните компании и инвеститори би пронашле интерес да го прошират својот бизнис.

Во делот на туризмот ќе дадам максимална поддршка на угостителско туристичкиот сектор во Охрид и сите оние кои што се поврзани со туризам на некаков начин. При што со завршување на КОВИД кризата во рок од три години ќе го достигнеме највисокото ниво на бројот на туристи во Охрид, како во 2019 година и во наредните 3 години ќе го зголемиме уште за 50%. Сето ова е поткрепено и врз основа на Стратегијата за туризмот изготвена од страна на факултетот за туризам во Охрид.

Ќе инвестираме во образованието и образовната инфраструктура. А како новина и обврска за која се залагаме е обезбедување на бесплатен оброк за учениците до 5 одделение.

Како поранешен спортист поддршката за спортот и спортските клубови во Охрид ќе биде еден од врвните приоритети. И сето ова надополнето со решавање на секојдневните проблеми и побарувањата на месните заедници и охриѓани.

Време е за промени. Време е за победи. Време е да одиме напред и нижиме успеси како Охрид, порача Пецаков.

Close